Зырянда екінші сынып оқушысы Тәнекееваның жоғалып кетуіне қатысы бар ер адамды полиция анықтап, ұстады.
Бұл туралы «ҚазАқпарат» хабарлады. Қыз бала кеше кешкісін қаладағы қараусыз қалған үйлердің бірінен өлі күйінде табылғандығын расталды.
«Шығыс Қазақстан облысы Зырян қаласында оқушы қыздың жоғалып кеткендігі жайлы хабарлама Зырян аудандық ішкі істер басқармасының кезекші бөліміне 10-қарашада түстен кейін түскен. Жоғалған қызды іздестіру үшін дереу іздестіру топтары құрылды, құтқарушылар мен жергілікті тұрғындар, көмектесуге ерік білдірушілер де қосылды. Көмек көрсету үшін оқиға орнына облыстық ішкі істер департаментінің жедел және тергеу қызметтерінің басшылығы мен қызметкерлері жіберілді.
Іздестіру іс-шаралары ұйымдастырылып, оның барысында қараусыз қалған үйден кәмелетке толмаған қыздың мүрдесі табылған. Жедел іс-шаралар кешені іске асырылып, қызметкерлер сезіктінің жеке басын анықтады. Полицейлер 1991 жылы туылған ер адамды ұстады. Ол – Зыряновск қаласының тұрғыны. Осы факті бойынша полиция қызметкерлері «Адам өлтіру» бабы бойынша сотқа дейінгі тергеуді бастады», делінген полиция департаменті жариялаған ресми хабарламада.
Еске сала кетелік, 10-қарашада 2-сыныптың оқушы қызы жоғалып кеткені туралы хабарланған. Көп ұзамай бүлдіршіннің өлі денесі табылғаны белгілі болды.