Сақ болыңыз! Шымкентте «Халық санағынан» келген ұрылар ұсталды
Шымкентте «халық санағын жүргізіп жүрміз» дегендер зейнеткерді тонап кетті.
Жасы 80-ге таяған ақсақал 1,6 миллион теңгесінен айрылып қалған. Әл-Фараби аудандық полициясына арызданған қарттың айтуынша, оның үйіне келген белгісіз екі азамат қарияны алдап соққан екен.
Аталған іс бойынша ҚР ҚК 188-бабы бойынша қылмыстық іс қозғалады. Арнайы шұғыл-тергеу тобы құрылды, деп хабарлайды ОҚО ІІД баспасөз-қызметі.
Көп ұзамай күдікті екеу қолға түскен. Олар жастары 30-ға таяған Қостанай облысының азаматтары болып шығады. Қазір полиция ұрылардың өзге де қылмыстарға қатысы бар-жоғын анықтауда.
Бірақ тінту барысында олардан ақсақалдан ұрланған қомақты қаражат табылмапты.
Полиция халықты сақ болуға шақырады. Бейтаныс адамдардың есік қағуына қатаң қарауға үндейді. Құнды дүние-мүліктерді адам қолы жетпейтін жерде сақтауға кеңес береді. Сондай-ақ әлеуметтік қызметкерлер ретінде келген азаматтардың құжатын тексеріп, нақтылау керектігін ескертеді. Ал мұндай қылмыстарға куә болған азаматтарды бейжай қарамауға шақырады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе