«500 деп шіренбе!». Алматылық таксистерге 5 кеңес!

Кәнігі таксист кеңес береді. Тәжірибесі бар. Таксист болып жүргеніне 10 жыл болыпты:

“Ешкімге тәуелді емеспін. Өзім би, өзім қожамын. Бар тапқаным — қалтамда. «Таксовать» еткісі дегендерге кеңес айтқым келеді. Онда да Алматы қаласындағыларға”, дейді.

1. Ақша табудың оңай жолы осы екен деп күні бойы қаланың ішінде бос шапқылай берме! Таңертең сағат 7 жарымда көшеге шық. Жұмысқа асыққандардың алды сол кезде шығады. Ұтылмайсың. Содан кешкі 9 жарымға дейін адам тасуға болады. Одан кейін адам сирейді. Азанғы шақта аз дегенде 5000 теңге қалтаға салуға болады.
2. Кешке шығам десеңіз – сағат 5-те шығыңыз. Бұл кезде Алматының адамдар жұмыстан қайтады. Қармағыңыз майланатын сәт. Ия, кешкі бестен тоғызға дейін ақша тауып қалуға болады.
3. Сенбі-жексенбі күндері «Мега» секілді ірі сауда, ойын-сауық орталықтарының маңын торуылдаған жөн. Келіп-кетіп жатқандардың есебінен шай-пұлыңызды ажыратасыз. Түнгі сағат 12 мен таңғы 4, 5-тер арасында түнгі клубтардың маңында жүріңіз. Клубтан теңселіп, ішімдікке жартылай тойып шыққандардың қолы ашық, жомарт келеді.
4. Жартылай жалаңаш, «ағай, ана бір жерге дейін жеткізіп тасташы», деп сызылған қыздарға тоқтай бермеңіз. Бұл – бос жүріс. Бензинге шығын. Олар көк тиын бермейді. Тіпті өтірік күліп, танысқан болып, ұялы телефонның өтірік нөмірін беріп кетеді. «Кездесейік аға, хабарласаңыз» дейтіндері бар. Әйтеуір, тегін жетіп алу үшін істемейтін қулығы, айтпайтын сөзі жоқ.
5. Қол көтерген адам 200-300 теңге десе де, ала бер! «500-700 деп шіренбе! Өйткені теңге тиыннан құралады. 200-ге біреуді алсаң, жолай тағы талай адам кездеседі. Көлігіңе бір бағытта 3 адам мініп, 300 теңгеден берсе, 900 теңге қалтаңда! Бұл жаман ба?