Соңғы кездері екі дүркін олимпиада чемпионы, ауыр атлетиканың рекордсмені жерлесіміз Илья Ильиннің осыған дейінгі жеңістері жойылады деген қауесет тарай бастады. Бұл долбар спортшының жанкүйерлеріне, барша қазақстандықтардың жанына қатты батты. Бүгін интернетте батыр жігітімізді қолдайтын, жастар жасаған видеоролик жарияланды.
«Ролик ауыр атлетикадан Қазақстандық екі дүркін Олимпиада чемпионы, Әлем чемпионы, Олимпиада рекордсмені Илья Иьинді қолдауға арналған. Чемпион – еліміз бір өзіңе сенеді», – деп жазылған видео анықтамасында.
Клиптің авторы видеотуындыда «Премьер-министр» тобының «Қос бриллиант» деген танымал әнінің әуенін пайдаланып, мәтінінде «Оның қанында допинг емес, жылқының еті, қымыз бар» деген сөздер айтылады.
Илья Ильиннен бөлек, допинг-шуға Олимпиада чемпионы Зульфия Чинчанлоның да есімі іліккен. Егер бұл ақпарат расталатын болса, екі спортшымызда Олимпиада ойындарындағы алтын жүлделерінен айырылатын көрінеді. Ал бүгін ҚР Мәдениет және спорт министрі бұл ақпаратты жоққа шығарды.
Министр:„ Егер қайталанып алынған сынамаға қатысты қорытынды шығарылса, онда, ең бірінші, бізге ескерту келіп түседі. Біз ондай ескерту алғанымыз жоқ. Сондықтан Ильинді айыптау – орынсыз„ деп мәлімдеді.