Жыл сайын қажылыққа барған қазақстандықтардың бес-алтауы Меккеде қайтыс болады
Қазақстанның Сауд Арабиясындағы елшіліктің мәліметі бойынша биылғы қажылық кезінде қазақстандықтардың ішінде адам өлімі тіркелген жоқ.
Дегенмен, отандастарымыздың басым бөлігі қайтыс болған ата-аналарын сол жерде жерлегенді жөн көреді, деп xабарлайды ҚазАқпарат тілшісі.
«Үстіміздегі жылы 3 000 қазақстандық қажылыққа барды. Түрлі жағдайлар болып тұрады. Бір кісілердің денсаулығы нашарлайды. Біреулер адасып кетеді, екіншілер төлқұжатын жоғалтып алады. Оның барлығы бірден сол жерде шешіледі. Себебі біз полициямен тығыз жұмыс жасаймыз», – деп атап көрсетті Қазақстанның Сауд Арабиясындағы Төтенше және Өкілетті елшісі Бақыт Батыршаев.
«Енді, адам қайтыс болған жағдайда оның туған-туысқандары «Меккеде жерлейміз» десе, сол жерде қалдыра алады. Елге алып келсе де болады. Бірақ осы уақытқа дейін қазақстандықтардың 95 пайызы қажылықта қайтыс болған туыстарын қасиетті Меккеде жерлегенді жөн көрді. Шыны керек, бір қажылық маусымында көп адам қайтыс болады ғой. Үш миллионға жуық адам келеді. Әрине, жағдай көп. Сондықтан арнайы жерлер бар, бәрі тегін. Жерлеу рәсімдерін де Сауд Арабиясы өзі төлейді. Барлығы тегін», – деп атап көрсетті елші.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе