Терроризм туралы жалған ақпарат берген ақтөбелік 4 жылға сотталды

3 тамыз 2016, 9:40

Терроризм туралы жалған ақпарат берген ақтөбелік 4 жылға бас бостандығынан айырылды. Сонымен қатар, сотталушы Ұлттық қауіпсіздік комитетінің облыстық департаменті, облыстық төтенше жағдайлар мен Ішкі істер департаменттеріне келтірген материалдық шығынды өтейді.

Бұл туралы Bnews.kz хабарлайды.

Ақтөбеде 26 жастағы жігіт Қылмыстық кодекстің «Терроризм актісі туралы көпе көрнеу жалған хабарлау» бабы бойынша сотталды. Ол енді 4 жылын жалпы режимдегі түзету колониясында өткізеді.

«Осы жылдың 23 мамыры күні сотталушы Руслан Тыныбеков облыстық төтенше жағдайлар департаментінің «112» телефон нөміріне қоңырау шалып, Ақтөбе қаласы, Қонаев көшесіндегі үйлердің бірінде жарылғыш зат қойылды деп хабар берді. Сөз соңында сотталушы «Аллах акбар» деп айтқан. Ол кінәсін толық мойындады, ісі үшін өкінетінін айтып, кешірім сұрады. Бұрын сотталмағандығы ескеріліп, 4 жылға бас бостандығынан айыру жазасы тағайындалды»,- дейді облыстық соттың баспасөз хатшысы Анар Айтжанова.

Айта кетейік, сотталушы Ұлттық қауіпсіздік комитетінің облыстық департаментіне 14 мың, облыстық төтенше жағдайлар департаментіне 30 мың, ал Ішкі істер департаментіне 40 мың теңге көлемінде материалдық шығынды төлейді. Ол жазасын жалпы режимдегі түзеу колониясында өтейді. Сот үкімі заңды күшіне енген жоқ.

Сот материалдарына сүйенсек, сотталушы Р.Тыныбеков сүйіктісімен сөзге келіп, ұрысып қалады. Кейін ол Қонаев көшесіндегі көпқабатты үйлердің бірінде тұратын ағасының үйіне кетіп қалған сүйіктісін сыртқа шығарып, татуласуды ойлаған. Арнайы телефон нөмірін сатып алып, төтенше жағдайлар қызметіне жалған хабар берген ол қарбалас кезінде сүйіктісімен татуласып үлгерген. Бірақ істі тергеген құқық қорғаушылар жалған ақпарат берген жігітті қамауға алды.