Тұңғышбай Жаманқұловтың жұбайы: Күйеуімді куәгер ретінде шақырған…
Танымал актер, продюсер Тұңғышбай Жаманқұловтың жұбайы – Дария Әбдумәлікқызы жолдасының қаражат жымқыруы мүмкін дегенге сенбейді.
Оның айтуынша, Жаманқұлов осы фактіге қатысты куәгер ретінде шақырылған болатын, деп хабарлайды ҚазАқпарат тілшісі.
«Маған ештеңе айтпай тұрыңызшы деді. Маған айтуға болмайды деп жатыр. Мен өзім кеше естідім. Тұңғышбайды алдымен куәгер ретінде шақырған болатын. Дерек-дәйек аламыз деді. Содан кейін алып қалды. Ары қарай не болғанын өзім де білмеймін. Мен қазір шынымен ештеңе айта алмаймын, ол басында тек куәгер ретінде шақырылған. Басқа жаңалық болса өзім де xабарласамын ғой», – деді Дария Әбдумәлікқызы ҚазАқпарат тілшісіне телефон арқылы.
“Маған бірдеңе айтсаң, іс насырға шабуы мүмкін деді. Сәл күте тұрайықшы. Мені тыңдап жатыр. Дәл қазір ештеңе айта алмаймын”, – дейді ол.
Еске сала кетейік, ҚР Ұлттық сыбайлас жемқорлыққа қарсы іс-әрекет бюросының мәліметіне сәйкес, «Феникс» көркем фильмін түсіруге арналған 79 млн теңге көлеміндегі бюджет қаражаты «Т.TURAN UNIVERSAL BUSINESS» ЖШС есеп-шотына аударылып, сол арқылы 69 млн. теңгесі ұрланғаны айтылған еді. Ал аталған фирманың құрылтайшысы – картинаның бас продюсері Тұңғышбай Жаманқұлов.
Ғаламтордан алынған кәсіпорынның төлқұжатына сәйкес, «Т.К.TURAN UNIVERSAL BUSINESS» ЖШС Алматы қаласының Алмалы ауданында орналасқан. Фирманың айналысатын саласы “көтерме және бөлшек сауда, автомобильдер мен мотоциклдерді жөндеу” деп көрсетілген. Қарашаның 2-сі күні бюджет қаржысын жымқырды деген күдікпен Тұңғышбай Жаманқұлов ұсталды. Сондай-ақ сот санкциясымен «Қазақфильм» АҚ-ның экономика және қаржы басқарушы директоры Г. Ысқақова мен атқарушы продюсер Н. Юдина тұтқындалды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе