Допинг дауынан соң спорттан шеттетілген Олимпиада чемпионы, рекордсмен, қазақстандық ауыр атлетші Илья Ильин қайтадан додаға қосылды.
Ол Талдықорған қаласында ауыр атлетикадан өткен Қазақстан чемпионатында 102 килограмм салмақ дәрежесіндегілермен бақ сынасып алтын медаль жеңіп алған еді. Бұл жеңісінің толық нұсқадағы видеосы интернетте пайда болды.
Онда халық аяғынан тік тұрып, Илья Ильинді зор қошеметпен қарсы алады. Ал соңғы өнер көрсетуінен соң Ильинді көрермендер аренадан жібермей, стадион дүр сілкініп, аяғынан тік тұрып, ұзақ қол шапалақтап жібермей қояды (видеоның 10-шы минутында). Осылайша арасы біршама уақытқа ажырап қалған чемпионы мен халқы сағыныса көрісті.
Араға бірнеше сағат салып Ильин де қазақстандықтарға Instagram парақшасы арқылы алғыс айтты.
“Бәріне сәлем! Көптен күткен алтын медалім міне. Үнемі жанымда демеу болып, маған табыс тілейтін жандарға, достарыма, жалпы бәріне алғыс айтқым келеді. Қолдауларыңыз үшін рахмет. Бұл біздің ортақ жеңісіміз. Бұл карьерамның басы болғандықтан, әлі талай жүлделер болады деген ойдамын”, — деп Илья медалін көрсетті.
Спортшының айтуынша, ол осымен тоқтап қалмақ емес. Алдына қойған мақсаттары көп.
https://kaz.365info.kz/symdykh-aj-shymkentte-bir-ajeldi-dualapty-video-330464
“Бүгін мен қайта оралдым. Енді әрі қарай да жұмысқа білек сыбана кірісетін боламын. Алда әлем чемпионаты күтіп тұр. Басты мақсат Олимпиада ойындары екені сөзсіз. Менің достарым, барлықтарыңызға рахмет! Мен сіздерді ерекше жақсы көремін! Бұл біздің ортақ жеңісіміз!” — деді Илья Ильин.