Өскеменде әскерде оңбай таяқ жеген сарбаз ауруханада ес-түссіз жатыр

Сәкен Ғабдуллин, Ж.Иманбердінің ағасы:

-Бізге ешкім хабарламаған. Тек жаны ашыған мейірбике ғана хабарлап айтқан. Біз содан бері жүгіріп жүрміз. Оны ұрған Қыстаубаев, Әбдіразақ және Мейрамбекұлы. Олар жауапқа бір адамды ғана Қыстаубайды алайын деп отыр.

Жанат бұған дейін үйіне бір емес, бірнеше мәрте хабарласып өзінің әлімжеттік көріп жүргенін айтыпты. Бірақ туыстары жағдайдың соншалықты ушығарын білмедік дейді. Соққыдан хәлі күрт нашарлаған сарбазды алғашында психикалық диспансерге жатқызыпты. Ал ондағылар оның беті бері қарамасын біліп, кеше ғана туыстарына хабар берген. Ағайыны іске араласқан соң, жауынгер жындыханадан қалалық ауруханаға ауыстырылды. Дәрігерлер болса әскерге жарамды саналған сарбазға «эпилепсия» деген диагноз қойған.

Әскери бөлім басшылығы болған жайтты нақты түсіндіре алмады. Мұнда әлімжеттік атымен жоқ деп ақталғандар, тек бұл жағдайға қатысты үш сарбаздың үстінен қылмыстық іс қозғалғанын мәлімдеді.

Мұхамедияр Айтжан, 5518 әскери бөлім командирінің орынбасары:

-Әскери полицияға қатардағы жауынгер Иманберді Жанат арыз жазыпты. Үш сарбаз жоғарыда көрсетілмеген қарым-қатынас көрсеткен. Сол бойынша әскери полиция қылмыстық іс қозғады. Қазір тексеру жүріп жатыр.

Дәрігерлер Жанаттың қазіргі ауруы уақытша ғана деп отыр. Яғни ол тілге келіп, ақыл-есін қайта жинауы мүмкін. Ал туыстары айыптыларды абақтыға қаматамыз деп, істі қолына алар адвокат іздеуде.