Ерте қартайған атыраулық Нұржан Өркешбаевтың шаңырақ көтергеніне 2 жыл болды. Жас отбасы бүгіндері тату-тәтті өмір сүріп жатыр.
Қос жұп Атырау облысы Қызылқоға ауданына қарасты Мұқыр ауылында 2015 жылдың күзінде дүркіретіп той өткізген. Салтанатты шараға 300-ден астам адам шақырылған. Бір айта кетерлігі, бүкіл елге бұқаралық ақпарат құралдары арқылы танымал болған Нұржан тойында тілшілердің болуын жөн санамапты.
– Нұржанды сүйгендігі соншалық,
5-6 баланы шұбыртып туатын,
Осы шаңыраққа тастай батып, судай сіңгені соншалық,
Төркініңе – Құлсарыға екі рет барам деп ант етші.
– Ант етем!
Үріп ауызға салғандай қалыңдық Нұржанмен түйдей құрдас, есімі – Әсемгүл. Ол да Атыраудың тумасы. Көшеде көздері түйісіп, бір-бірін құлай сүйіп қалған қос ғашық бір жылдай қыз бен жігіт боп жүріп, ақыры шаңырақ көтеруді жөн көрген. 300-ден астам қонақ шақырылған тойды 4 асаба басқарды. Ал осыдан 4 жылдай бұрын «Пусть говорят» ток-шоуына қонақ боп қайтқан Нұржан сол кезде Андрей Малаховты өзінің тойына шақырған еді. Атақты жүргізуші болса, сонау қиырдағы Қызылқоға ауданына барып, тіпті тойды жүргізіп беремін деп уәде берген.
Бірақ Малахов сөзінде тұрмады. Тек әлдекімдер арқылы демалыста жүргендіктен тойға келе алмайтынын, бірақ жас жұбайларға арнайы сыйлық беріп жіберетінін айтып, сәлем жолдапты. Ресейлік тележүргізушінің Нұржанға тигізген бір пайдасы – осы бағдарламадан кейін оған Алматыда пластикалық ота жасалды. Сол кезде хирургтер оны 30 жылға жасарды деп жар салған еді. Бірақ қазіргі бет-әлпетінен ондай өзгеріс байқалмайды.