«Роскосмос»: Байқоңырдан кету жоспарымызда жоқ
Ресей ғарыш агенттігінің басшысы Игорь Комаров Интерфакс агенттігіне берген сұхбатында «Роскосмостың» Байқоңыр ғарыш айлағын тастап кету жоспарларында жоқ екенін мәлімдеген.
Комаровтың сөзінше, Байқоңырда салынған инфрақұрылымдардың ресурсы әлі сарқылмаған. Ол «Союз» зымыран-тасығышын Байқоңырдан көшіру мүмкін емес дейді. Көктемде Ресейдің Амур облысында Восточный ғарыш айлағынан бірінші зымыран ұшырылған болатын.
Ресейдің Байқоңырдан кетпейтіндігі жөнінде өткен аптада вице-премьер Дмитрий Рогозин де мәлімдеген. Ол Интерфакске берген сұхбатында «Роскосмос» басшысы ғарыш саласында Қазақстанмен қарым-қатынасты кеңейтуге және Байқоңырдың техникалық мүмкіндіктерін дамытуға ниетті екенін айтты деген.
Ресей вице-премьері мен «Роскосмос» басшыларының мұндай мәлімдеме жасауына Қазақстанның бірінші вице-премьері Бақытжан Сағынтаевтың Мәскеу 2025 жылдан кейін Байқоңыр ғарыш айлағын пайдаланудан бас тартуы мүмкін деген сөздері түрткі болды. Мәскеуде журналистермен кездесу кезінде ол Ресей бас тартқан жағдайда Қазақстан билігі Байқоңырды басқа елдерге жалға береді деген.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе