Павлодардағы «Сарыарқа» шағын ауданында жаңа тұрғын үй ел игілігіне берілді. 132 отбасы жаңа пәтердің кілтін алды, деп хабарлайды Bnews.kz тілшісі.
«Бұл «Сарыарқа» шағын ауданының құрылысы жүзеге асырыла бастағаннан бері ашылып жатқан үшінші үй. Бізде жаңа тұрғын үй кешенін құру үшін қажеттінің бәрі бар. Ендігі жерде тек ескі екі қабатты үйлерді бұзып, олардың орнына жаңа үйлер салу қажет. Мен болашақта тұрғын үй құрылысының көлемі арта түседі деп ойлаймын», – деді аймақ басшысы.
Жаңа 12 қабатты тұрғын үй «Өңірлерді дамыту-2020» бағдарламасы аясында тұтас құрылыс технологиясы бойынша тұрғызылды. Жоба құны 1,3 миллиард теңгені құрайды. Үйде 99 екі бөлмелі және 33 үш бөлмелі 132 пәтер бар. Бірінші қабатта 15 үйірме жұмыс істейтін балаларға арналған техникалық мектеп орналасқан. Жаңа нысанның жалпы көлемі – 7 мың шаршы метрден астам.