Павлодар облысында карантин жарияланды

Облыс прокуратурасы бұл фактіге қатысты қылмыстық іс қозғалғанын мәлімдеді.

Павлодар облысының тұтынушылар құқығын қорғау департаменті жетекшісінің міндетін атқарушы Ирина Сорокина ауру мал етін тұтынғандар саны 25-тен 42-ге өскенін айтып отыр. Бұл адамдар 8 күн бойына дәрігерлердің қарауында болады.

Облыс прокуратурасының ұсынысы бойынша, алдағы күндері аймақтағы барлық ет өңдеуші кәсіпорындар тексерілетін болады.

8-шілдеде Павлодар облысы, Ертіс ауданы, Ұзынсу ауылының екі тұрғыны сібір жарасы дертін жұқтырды деген күдікпен ауруханаға түскенін баса айта кетелік. Ал 9-шілдеде тағы бір адам ауруханаға келіп түседі. Ұзынсу ауылының 51 жастағы тұрғының жағдайы өте ауыр деп бағаланып отыр. Эпидемиолог дәрігер Гүлмира Құлмағамбетованың айтуынша, ол адам ес-түсін біледі.

— Ауылдың үш тұрғыны да шикі етті ұстаған, яғни, олар мал сойған кезде бірге болған. Барлығының қолының терісі күлдіреп, ұсақ іріңдер пайда болған. Бұл сібір жарасы болуы мүмкін. Екі-үш күннен кейін бактериологиялық сараптама нәтижелерін аламыз. Үшеуі де сандырақтап, ауруханаға ауыр халде түсті, — дейді облыстың штаттан тыс бас эпидемиолог дәрігері.

Естеріңізге салсақ, осының алдында сібір жарасы дерті Қарағанды мен Шығыс Қазақстан облыстарында тіркелген болатын. Екеуінде де адамдар бұл дертті мал сою кезінде жұқтырған.