«Бүгін Мәдениет министрінің аузынан “Қазақ туризмі” атты жаңа ұлттық компанияның құрылғанын естідік. Жаңа акционерлік қоғам Қазақстанның туристік әлеуетін шет елдерде насихаттап, инвестиция тартумен айналысады екен», деп жазады Facebook-тегі парақшасында Нұрболат Туысбайұлы.
«Жеке ойымды айтайыншы»,
деп әңгіме бастаған пост авторы былай дейді:
«Әріге бармай-ақ, ең алдымен өз еліміздегі демалыс орындарын реттеп алған дұрыс сияқты. Қазір қолында ақшасы бар кез-келген адам Бурабай мен Алакөлден гөрі шекараның арғы бетін аңсап тұрады. Биыл мен де сөйттім.
Себебі, біріншіден бізде баға ұшып тұр. Біреуінде сервис сын көтермесе, біріне барар жол жоқ. Бұл сылтау емес, солай!
“Кеттік Түркияға!” деп, өре түргелмес бұрын, іздендім. Қатонқарағайға дейін қоңырау шалдым.
“Биылғы прайс шыққан жоқ, былтыр адам басына тәулігіне 28 мың теңге болған” деді.
Санайық.
Екі адамға 60 мың делік. 7 күнге 420 000 теңге. Бұл не баға? Қолында жарты миллион (!) ақшасы бар адам ел көріп, жер көрем деп, Эмиратқа кетіп қалмай ма?! За то 5* қонақүйде жатады…
Бізде онсыз да Туризм департаменті бар. Инвестициялар және даму министрлігіне қарайды. Әлгі министр мырза айтқан шаруамен осы ведомство да айналыса алады деп ойлаймын.
Жан-жақтан ұлттық компанияларды аша бергеннен бұрын жұрттың аузында жүрген жоғарыдағы үш мәселені жолға қойып алған дұрыс.
Шетелге атымызды шығарамыз деп, шаба бермей, бірінші елдегі туризмді бір ізге салып алайық. Сол».
Міне, ел осылай дейді.