Қарағанды тұрғындарын мемлекеттің тұрғын үй қорынан пәтер алып беремін деп сендірген әйел жиырмаға тарта адамды алдаған. Алаяққа өз еріктерімен миллиондаған ақшаларын санап берген қарағандылықтар сотқа жүгінген. Зардап шегушілердің жалпы шығыны 28 миллион теңге.
Бұл туралы Baq.kz хабарлады.
Зардап шеккендер пара беру арқылы заң бұзғандықтарын білмегендіктерін айтады. Қомақты қаржыларын әкімдік «қызметкерінің» қолына ұстатып, армандарындағы пәтерлерін күте-күте зарыққан олар алаяққа алданғандықтарын білген. Жапа шеккен тұрғындар құқық қорғау органдарына шағымданып, алаяқ әйелдің үстінен арыз түсірген. Көп ұзамай 28 жастағы қала тұрғыны ұсталып, тергеу уақытында темір торға қамалған.
Қазыбек би аудандық соты әкімдіктің жалған қызметкерін 5 жылға бас бостандығынан айыру жайлы шешім шығарды.
«Оған өмір бойына жылжымайтын мүлік саласында қызмет жасауға тыйым салынды. Ол жазасын орташа қауіпсіздіктегі колонияда өтейтін болады», – деді Қазыбек би аудандық сотының судьясы Арғын Кутышев.
Сондай-ақ, алаяқ әйел зардап шегушілердің 28 миллион теңгеге тарта ақшасын қайтарып беруі тиіс. Бірақ оның бұл қаржыны қалай, қашан қайтаратыны белгісіз. Себебі, оның меншігінде не пәтер, не автокөлік жоқ.