Мәскеу халықаралық қатынастар мемлекеттік институтының (МГИМО) күзетшісі хиджап киген қызды табалдырықтан аттатпай қойған.
Ол: “Оқығыңыз келсе – хиджапты шешіңіз!” деп салған. Мұның барлығы бейнежазбаға түсіп, әлеуметтік желіге тарап кетті.
“Діндар адамның құқығы аяқ-асты етілді! Менің сіңлім – медалист, мектепті “5-ке” бітірді, МГИМО-ға құжатын тапсырған, емтихан тапсыру үшін дайындық курсынан өту үшін онда барған. Оны күзетші жібермей қойған. Күзетші жоғары оқу орны ғимаратына хиджап кигендерді кіргізбеу туралы бұйрық барын айтыпты.
Жарғыда бас киіммен кіруге болмайды делінген… Мен мәселені шешу үшін бірден Мәскеуге ұшып бардым. Сөйтсем күзетші бастығы: “Оқығысы келсе – хиджабын шешсін”… Біздің институтта хиджаппен ешкім жүрмейді… Сізге де солай” деп қарап тұр” деп жазады Instagram-дағы жеке парақшасында amina_shabanova.
Мұның арты үлкен дауға айналып, заңгерлер араласа бастаған соң институттың басшылығы бұл жайтқа назар аударған. Құқық мәселелері жөніндегі проректор Сергей Шитьков қыздың туыстарына оның хиджаппен университетте емін-еркін жүре беруіне болатынын мәлімдепті.