Батыс Қазақстан облысында 4-тамызда газ толтыратын бекет жарылып, екі ер адам зардап шеккен. Бүгін олардың кім екенін, жағдайлары қалай екенін дәрігерлер айтып берді.
Бөрілі аудандық орталық аурухананың директоры Жұмабек Шайхиевтің айтуынша, жан сақтау бөліміне апат орынынан өте ауыр халде екі жігіт жеткізілген. Бұл туралы „Мой город„ жергілікті басылымында хабарланды.
– Екеуі де қатты күйіп қалған. Біреуінің дене терісінің 95 пайызын, тағы бірінің 75 пайызын күйік шалған. Жағдайлары өте ауыр деп бағаланады. Қажетті дәрігерлік емдік шаралардың барлығы қолданылып жатыр, – деді Жұмабек Шайхиев.
Сондай-ақ аудандық орталық ауруханының директоры күйік шалған жігіттерді басқа жаққа тасымалдауға болмайтынын, оған жарамсыз екенін де айтады.
Кеше Батыс Қазақстан облысының Ақсай қаласында „Алау„ ЖШС-ға тиесілі газ толтыратын бекетте жарылыс болып, екі ер адам зардап шеккен болатын.