Ертіс өзенінің деңгейі көтеріліп, жағалаудағы 57 саяжайды су басты

27 маусым 2016, 10:30

Бірер күн бұрын өз деңгейінен күрт көтерілген Ертіс өзені қазіргі күні Өскемен және Семей қаласының тұрғындарына аса қауіп туғызып отырған жоқ. Облыс басшылығы айтып өткендей, су қоймасына жиналған суды дер кезінде жіберіп отырғандықтан, бүгіннен бастап өзеннің деңгейі қайта түсіп келеді.

Бұл туралы Шығыс Қазақстан Аймақтық комуникациялар қызметінде өткен баспасөз мәслихатында ШҚО әкімінің орынбасары Димитрий Гариков мәлімдеді, деп хабарлайды baq.kz. Оның айтуынша өзен деңгейінің көтерілуіне Қытайда жауын-шашынның толассыз жаууы себеп болған. Кейін шекаралас аймақтағы 7 бөгет толып кеткендіктен, жіберілетін су көлемі де артқан.

– Ертіс өзенінің деңгейі көтеріліп, жағалаудағы 57 саяжайды су басты. Бірақ бұл саяжайлар ешбір қауіпсіздік ережелерін сақтамай, жағалауға жақын салынған және ол жерде ешкім тұрмайды. Славский атындағы жағалауды да су басты. Бірақ бүгін сағат 12 шамасында су деңгейі 40 см-ге түсті. Сондай-ақ, су басуы мүмкін аймақта орналасқан үйлерден 105 азамат қауіпсіз аймаққа көшірілді. 18 маусымдағы көрсеткішпен салыстырғанда, келіп жатқан су деңгейі 1,5 есеге дейін түсу көрсеткіші байқалады. Сондықтан бірер күнде Ертіс өзені өз қалпына келеді деген сенімдеміз

– деді Димиртий Гариков.

Аймақ басшысының орынбасары сондай-ақ, әлеуметтік желілердегі Қытайдағы бөгет жарылғандығы жайлы түрлі қауесеттерге сенбеуге шақырды. Ал бейнежазбалардағы бөгеттегі тасып жатқан су гидроэлектростанциядағы күнделікті суды жіберу үрдісі екендігін жеткізді.

– Шүлбі, Бұқтырма су қоймаларындағы су деңгейі көтерілгендіктен, жіберілетін су мөлшері де артты. Сондықтан алдын-ала Павлодар облысының әкімдігін ескерттік. Дегенмен, оның өзі қауіп туғызатындай деңгейге көтерілмейді. Ал біздің гидроэлектростанцияларымызға жиналған су кейін керісінше станцияның жақсы жұмыс істеп, электр энергиясын өндіруге өз септігін тигізеді, – деді Димитрий Гариков