“Еңіреп жылап тұрды…”. Денис Теннің өліміне қатысы бар Нұралы Қиясовтың танысы өз шындығын айтты

Нұралы кішкентайынан елгезек бала болды. Жоқшылықтың салдарынан ол барынша анасына көмектесіп жүретін. Мектепте оқып жүріп, ұсақ-түйек сататын. Мәселен, барлық оқушылар жаңа жыл мерекесін тойлап жүргенде, ол салют сататын сыртта. 8 Наурызда гүл сатып жүреді. Аңқаулығы да бар. Талай рет достарының сатқындығынан опық жеді. Жоғары білімі жоқ, тек Меркідегі колледжді аяқтады”, – дейді ол.

Нұралы Қиясовтың танысы Денис Теннің қазасын аса ауыр қабылдағанын да жеткізді.

“Халқымыздың аяулы ұлы қыршыннан қиылды. Денистің қазасы маған өте ауыр соққанын сезіп те тұрған шығарсыз. Бүгінде әлеуметтік желі арқылы оның ата-анасы мен таныстарына, туыстарына халық қарғысын жаудырып жатыр. Осы орайда, көпшілікті сабырлы болуға шақырғым келеді.

Ешбір ата-ана баласын жаман болсын демейді. Қазір олардың жағдайы да өте қиын. Түсіністікпен қарасаңыздар екен. Тағы бір айта кетерлігі, Нұралы оқиға орнын полицейлерге көрсетуге апарғанда, бетін жауып, еңіреп жылап тұрды.

Ал қызылордалық күдіктінің беті шімірікпестен отырғанын көрдіңіздер. Мен екеуін де ақтамаймын, бірақ, Нұралыны адам өлтірді деп айыптауға аузым бармайды”, – деді дереккөз.

Еске сала кетейік, 19 шілде күні автокөлік ұрлаушылардың қолынан қаза тапқан мәнерлеп сырғанаушы Денис Тен көз жұмды. Алматыда мыңдаған адам чемпионды соңғы сапарға шығарып салды.