БҰҰ Қауіпсіздік кеңесінің төрағасы: Астана процесін тағатсыздана күтудеміз
Қазақстанда дүйсенбі күні Астанада ұйымдастырылатын кездесуді тағатсыздана күтудеміз.
Бұл жайында БҰҰ Қауіпсіздік кеңесінің төрағасы БҰҰ-дағы Швецияның тұрақты өкілі Олаф Скуг 20 қаңтар күнгі кеңес отырысының қорытындысында мәлім етті, деп хабарлайды ҚазАқпарат.
«Біз Сириядағы ахуал төңірегінде, оның ішінде №2336 қарардың орындалуы мен алдағы Астанада болатын кездесу жайында пікір алмастық. Біз Ресей мен Түркияның зорлық-зомбылықты тыю, соғыс отын тоқтату режімін құру және БҰҰ қамқорлығымен саяси процеске серпін беру күш-жігеріне қолдау білдіреміз. Біз барлық тарапты Сириядағы соғысты тоқтату режімін сақтауға шақырдық», – деді БҰҰ Қауіпсіздік кеңесінің басшысы.
«Біз ДАИШ-тың Сириядағы тағылық террорлық актілерді жалғастыруын, соның ішінде Пальмирадағы ЮНЕСКО-ның мәдени мұра тізіміне енгізілген Рим театры сынды мәдени мұраларды талқандауын түбегейлі айыптадық. Қазақстан дүйсенбі күні Астанада ұйымдастыратын кездесуді тағатсыздана күтудеміз. Оны сириялық саяси процестің маңызды бөлігі және 8 ақпанда Женевада БҰҰ қамқорлығымен қайта жаңғыртылатын сириялық келіссөздердің маңызды қадамы ретінде қарастырамыз», – деді Олаф Скуг.
Естеріңізге сала кетсек, Сириядағы ахуалды реттеу бойынша халықаралық келіссөздер 23 қаңтар күні Астанада өтеді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе