Астана қаласының ішкі істер департаменті полиция қызметкерлерінің арасында викторина ойнатып, олардың ағылшын тілін тексерді.
Бұл туралы Астана қалалық ішкі істер департаментінің баспасөз қызметі хабарлады.
Жарыс кезінде полиция қызметкерлері туристермен қалай сөйлесу керектігін көрсетіп, жол ережесін бұзған жағдайда, ұрлық фактісі тіркелсе, қалай айыппұл толтыру керектігін жаттады. Кейбір грамматикалық қателерге қарамастан, әділ қазылар алқасы Астананың полиция қызметкерлері тапсырманы орындады деп баға беріп, арнайы алғысхатпен марапаттады. Тәртіп сақшылары сондай-ақ ағылшын тілінде жиі қолданылатын сөздерді айтып жарысты.
Астана қалалық ішкі істер департаментінің бастығы, полиция генерал-майоры Амантай Әубәкіров:„ЕХРО көрмесі кезінде астаналық полиция қызметкерлері қонақтардың және нысандардың қауіпсіздігі үшін жауапты. Қазірдің өзінен қылмыс санын қысқартып, тіл үйреніп, тәртіп орнатып халықаралық шараға дайындалып жатырмыз„ – деді.
Жалпы, Ішкі істер департаментінің мәліметіне сүйенсек, Астана полициясы 2014 жылдан бері ағылшын тілін үйреніп келеді екен. Оқу курстары тегін. Яғни, ниет білдірген кез келген қызметкер курсқа жазылып, ағылшын тілін жетілдіре алады. Осы уақытқа дейін 500-ден астам полиция осындай оқудан өтіпті.