Қарағанды облысының әкімі Нұрмұхамбет Әбдібеков Шет ауданында болып, жиын өткізді. Оған сібір жарасы індеті шыққан Еркіндік ауылы тұрғындары да қатысты.
Бұл туралы өңір басшысының баспасөз қызметіне сілтеме жасап, ҚазАқпарат хабарлайды.
«Ветеринария, ветеринариялық инспекция, тұтынушыларды қорғау департаменті, жергілікті полиция қызметтері жүргізілген жұмыстар жөнінде баяндады. Тұрғындардың көптеген сұрақтарына жауап қайтарылды», – делінген хабарламада.
Өңірдегі төтенше жағдайға байланысты Қарағанды облысының әкімі өзінің екі орынбасарына сөгіс жариялап, облыстық деңгейдегі бір шендінің қызметін төмендеткен. Сол секілді аудандық деңгейдегі үш басшыны жұмыстан шығарған.
Қарағанды облысы Шет ауданы Еркіндік ауылында сібір жарасына байланысты төтенше жағдай енгізілді. 15 күн мерзімге карантин жарияланды. Анықталғанындай, ауыл тұрғыны сібір жарасына шалдыққан сиырын сойып, туыстары мен көршілеріне таратып берген.
Төтенше жағдай фактісі бойынша ҚР Қылмыстық кодексінің 1-бөлімі 327-бабы бойынша (Індеттің таралуына немесе басқа да ауыр салдарларға соқтырған ветринария ережелерін бұзу) сотқа дейінгі тергеу амалдары қозғалды.
Қарағанды облысы денсаулық сақтау басқармасының мәліметтері бойынша, 19-21 маусым аралығында облыстық жұқпалы аурулар ауруханасына түйнемеге күдікті 8 адам жатқызылған, оның ішінде 10 жастағы бала бар. Олардың екеуі – 33 жастағы әйел мен 49 жастағы ер адам қайтыс болды. Олардың бәрі де Шет ауданындағы Еркіндік ауылының тұрғындары. Кейінірек тағы бір адам ауруханаға жеткізілді.