Алты ұлттық компанияның акциялары саудаға шығарылып жатыр

16 мамыр 2017, 14:00

«Самұрық-Қазынаның» басқарушы директоры Берік Бейсенғалиевтің айтуынша, ресурстық сектордағы кәсіпорындардың сатылымға шығарылатын акциялары 25 проценттен аспауы тиіс, яғни бақылау пакеті ұлттық әл-ауқат қорының меншігінде болады. Ал басқа салаға бағытталған компаниялардың бақылау пакеті сатылуы мүмкін. Акцияларды ел азаматтарымен қатар шетелдіктер де сатып ала алады.

Берік Бейсенғалиев, «Самұрық-Қазына» АҚ басқарушы директоры, басқарма мүшесі:

– Акцияларды орналастыру алаңы әзірге анықталған жоқ. Бірақ қор «Астана» халықаралық қаржы орталығына басымдық беріп отыр. Ал акциялардың бағасын нарық анықтайтын болады. Яғни компаниялардың дайындығы мен шикізат ресурстарының құнына байланысты. Үнемі IPO кезінде компанияның қаржылық жағдайы, оның даму келешегі жөнінде ашық айтылады. Сатылымға шығарылатын кәсіпорындар жөнінде есеп жүргізіліп отырады.