Алматылық палуан қошқарды 510 рет көтеріп, рекорд орнатты

Алматының орталық мешітінде Асыл мұра бағдарламасы аясында мұсылмандардың мерекесі Құрбан айтқа арналып ұлттық спорт түрлерінен жарыстар өтті, – деп хабарлайды Tengrinews.kz тілшісі ақпараттық-спорттық ХАБ-қа сілтеме жасап.

Іс-шара таңғы айт намазынан кейін 4,5 мың адамның қатысуымен басталған. Кез келген қатысушылар өздерін қошқар көтеру, қол күрес, бағанаға шығу және асық атудан сынап көрді. Жеңімпаздар мен жүлдегерлер бағалы сыйлықтар, сондай-ақ, қошқар көтеру жүлдегерлері 40 келі қошқарларға ие болды. Оның екеуі 505 және 510 рет көтерген жас палуандар Бауыржан Әбдіхайым мен Ильяс Жұмайға бұйырды.

“Мен қатысам ба жоқ па деп көп ойландым. Себебі алда Ресейде жарыс күтіп тұр. Бірақ 505 дегенді көріп, жігерленіп, қатысуға бел будым. Осылайша 510 рет көтеріп өзім үшін рекорд орнаттым. Мен әрқашанда өз қарсыласымды жеңуге тырысатын адаммын, бүгінде ұтуға тырыстым. Егер ол қошқарды 600 рет көтергенде, мен 605-ке жеткізуге талпынатын едім”, – дейді еркін күрестен Қазақстан ұлттық құрамасының мүшесі Ильяс Жұмай.