Алматыда баланы шымшылап, оны бетінен ұрып жіберген интернат тәрбиешісі жұмыстан шығарылды, – деп хабарлайды Tengrinews.kz.
Бұл оқиға 1 қыркүйекте, дүйсенбіде жағдайы төмен отбасылардан шыққан балаларға арналған №10 жалпы білім беретін интернатта болған. Тәрбиеші үш оқушыны тақтаға шығарып, сыныптастарының көзінше айғайлап ұрыса бастаған. Тіпті бір оқушының қолынан жұлқылап, бетін шымшып, ұрып жіберген.
“Біздің өзіміз есеңгіреп қалдық. Мектеп директоры бұл жайлы кеше ғана естіп, бірден шаралар қабылдады. Тәрбиеші педагогикалық этиканы бұзғаны үшін жұмыстан шығарылды. Әйел өз кінәсін мойындады. Баланың ата-анасы шағым түсірген жоқ. Қазіргі уақытта білім басқармасындағылар жедел жиын өткізіп жатыр. Интернаттың жұмысы бақылауға алынды”, – деп хабарлады Алматы қалалық Білім басқармасының басшысы Гүлнар Айтқұлова.
Айта кетейік, №10 жалпы білім беретін интернат жағдайы төмен отбасылардан шыққан балаларға білім беретін екі оқу мекемесінің бірі. Мектепте шамамен 200 оқушы бар.