Ақтөбеде кісі қолынан қаза тапқан науқастың туыстары жындыхана басшыларын жазалауды талап етті. Ақыл-есі кем адамдарға арналған интернат-үйде 32 жастағы Жазира Сарыбалинаны палатасындағы көршісі буындырып өлтірген. Ал бұны дәрігерлер жасырмақ болыпты. Дегенмен, адам өлтірген жындының ісі сотқа жетті. Бірақ оның түрмеге қамалмайтыны анық. Енді қандай жазаға кесілуі мүмкін?
Адам өліміне қатысты бұл сот отырысына айыпталушы қатыспайды. Келген күннің өзінде берген жауабының ешқандай күші жоқ. Өйткені жынды деген қағазы бар. Ақыл-есі кем адамдарға арналған интернат-үйде емделіп жатқан 28 жастағы Марина Солдатова палатасындағы көршісін орамалымен буындырып өлтірген. Ыңырсып ұйқысын қашырған науқастың ауызына алдымен шүберек тығып, тыныштандырмақ болыпты.
“Сегізінші палатада жатқан Солдатова көршісінің ыңырсып, ұйқы бермегеніне ашуланады. Содан науқастың үстіне шығып, бетінен ұра бастайды. Керуетте ілулі тұрған жаялықты алып, аузына тыққан. Сосын орамалмен мойнынан қылғындырады”,-деді мемлекеттік айыптаушы Дидар Әубәкіров.