Бішкектен Мәскеуге бет алған 20 қырғыз азаматы отырған автобус Қазақстан аумағында жол-көлік апатына ұшырады.
Бұл туралы КирТаг агенттігі хабарлады.
«30 қазан күні Қазақстан аумағында шамамен таңғы 04:00-де ішінде Қырғыз елінің 20 азаматы бар автобус аударылды. Барлық жолаушы қатты жарақат алды. Бес адам ауыр жараланып, ауруханаға түсті», – деп жазды автобус жолаушысы Нуркыз Назаркулова өзінің Facebook парақшасында.
– Құзіретті органдардың мәліметтеріне сүйенсек, жол-көлік оқиғасы тіркелмеген. Сонымен бірге, елшілік телефон арқылы осы ақпаратты таратушы Нуркыз Назаркуловамен тілдесті. Оның айтуынша, 2016 жылы 29-нан 30-қазанға қараған түні таңғы 05:30-да ҚР Ақтөбе облысында Мерседес-Спринтер жүргізушісі көлікті басқара алмай, жыраға түсіп кеткен, – деп хабарлайды елшілік.
Елшіліктің хабарлауынша, салонда 18 жолаушы және 2 жүргізуші болған. Жол-көлік апатынан жүргізушілер мен жолаушылар түрлі дене жарақатын алған. Ақтөбе облысы Хромтау ауданының дәрігерлері қажетті көмек көрсеткен соң, 13 жолаушы өзге автокөлікпен Ресей Федерациясына жүріп кетті. 5 зардап шегуші кері еліне оралу туралы шешім қабылдапты.
«Нурқыз Назаркулованың айтуынша, автобус жүргізушісіне еш шағым болмағандықтан, ҚР құзырлы органдарына ресми хабар берілмеген. Мерседес-Спринтер Бішкек қаласынан Мәскеуге бағыт алған, ондағы жолаушылар мен жүргізушілер – Қырғызстан азаматтары», – деп хабарлайды елшілік.