Жасөспірімдер Олимпиадасында қазақстандық спортшылар 12 медаль жеңіп алды
6 қазан мен 18 қазан аралығында Аргентина астанасы Буенос-Айресте өткен ІІІ жасөспірімдердердің жазғы Олимпиадасында Қазақстандық спортшылар 4 алтын, 3 күміс, 5 қола медаль жеңіп алды.
Олимпиадаға Қазақстаннан спорттың 23 түрінен 58 спортшы аттанды.
Қазақстан құрамасының нәтижесін ұсынамыз:
9 қазан күні дзюдошылар Маргарита Гриценко (- 78 кг) мен Бекарыс Сәдуақас (- 100 кг) татамиге шықты. Маргарита қола жүлдеге ие болса, Бекарыс қарсылас шақ келтірмей чемпион атанды. Айта кетерлігі, жарысқа қазақстандық екі дзюдошы ғана қатысқан болатын.
13 қазанда Диас Бахриддин каноэ есуден спринт жарыста чемпион атанды. Ал қыздар арасындағы байдарка есу жарысында Стелла Суханова қола жүлдегер атанды.
18 қазан күні велоспорттан Қазақстан ерлер командасы мүшелері Глеб Брусенский мен Евгений Федоров бес кезеңде 418 ұпай жинап, жеңімпаз атанды. Ал бокстан 91 келіден жоғары салмақ дәрежесінде Дамир Тойбай күміс жүлдегер атанып, қыздар арасында Надежда Рябец (-75 кг) қола жүлдеге ие болды. Бокстан Айбек Оралбай (91 кг) жасөспірімдер Олимпиадасының чемпионы атанды.
19 қазанда жарыстың соңғы күнінде алғаш рет олимпиада бағдарламасына енген карате спортынан Әбілмансұр Батырғали (-68 кг) қола жүлдеге ие болды. Боксшы Талғат Шәйкен (64 кг) финалда ресейлік спортшымен кездесіп, төрешілер шешімімен жеңіліс тапты. Осылайша ол жасөспірімдер Олимпиадасының күміс жүлдегері атанды.
Еске сала кетсек, 2014 жылы Қытайдың Нанкин қаласында өткен жасөспірімдер Олимпиадасында ұлттық құрама 8 медаль жеңіп алып, жалпы есепте 21-орыннан көрінді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе