“Жас Қанат” байқауының продюсері: жарыс жолынан шығып қалған бір әншіні келесі кезеңге өткізе алам
Елордада жас дарындар шығармашылығына арналған «Жас Қанат» байқауы шымылдығын түрді.
Осымен 26-рет өтіп отырған шараға еліміздің әр өңірінен 14 жас әнші іріктелініп алынған деп хабарлады “Хабар” телеарнасы. Енді олар үш күн бойы Астана аспанын әнге бөлейді. Түрлі жанрда бақ сынап, қазылардың көңілінен шығуға тырысады. Ал ең талантты 5 қатысушы ақтық сынға жолдама алады.
Айта кетейік, республикалық жас орындаушылар байқауы 1992 жылдан бері дәстүрлі түрде өткізіліп келеді. Осы уақыт ішінде 300-ге жуық әнші бағын сынады.
«Жас Қанат» мектебінен Медеу Арынбаев, Сәкен Майғазиев, Мәдина Сәдуақасова, Жанар Дұғалова, Маржан Арапбаева мен әлем таныған Димаш Құдайберген секілді дүлдүлдер түлеп ұшқан.
Мұрат Ерғалиев, байқаудың бас продюсері:
– Биылғы байқаудың ең жас қатысушысының жасы – 15-те. Конкурсқа жасы 30-ға дейінгі таланттар қатыса алады. Жалпы жылда байқаудың форматын өзгертіп отырамыз. Мәселен, биыл қазылар таңдаған бірнеше адам екінші турға өтеді. Ал мен бас продюсер ретінде жарыс жолынан шығып қалған бір әншіні ІІ-турға өткізуге құқығым бар.
Айкүміс Сексенбаева, Kazakh TV арнасының бас продюсері:
– «Хабар» Агенттігі бірінші күннен ақпараттық қолдау көрсетіп жатыр. Биыл да осы дәстүр жалғасады. Kazakh TV арнасынан осы айдың аяғында телевизиялық нұсқасын көруге болады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе