Бірде ұялы телефонымды құлатып алып, жөндеуге апардым. Үйге жақын жерде телефонға қажетті құрал-жабдықтар сатылатын дүңгіршекте шеберхана бар екенін көзім шалған болатын.
Онда екі жігіт жұмыс істейді. Біреуі орыс жігіті, кең жейде мен қысқа балақ шалбар киген. Үстелінде құран кітабы жатыр. Мойнына дейін түскен сақалы бар. Мұсылмандықты қабылдаған екен, оны кейін білдім.
Жанындағы қазақ жігіттің сақалына көзім түсіп бұл да “уахабит” екен ғой деп ойладым.
Бірақ оның киімі заманға сай, түсі жылы. Телефонымды жөндеп жатқанда күтіп, жанында тұрдым. Бекер тұрғанша әңгімелесіп тұрайын дедім де, есімін сұрадым. Досан, жасым 23-те деді. Менің тағы да не сұрағым келгенін сезіп қойды да:
— Мен сектант емеспін, бізді елдің бәрі уахабист деп ойлайды. Мен Әлхәмдуллиллах мұсылманмын. Дін жолына түскеніме үш жыл болды. Алла-Тағаланың әмірлерін қалтқысыз орындау пендені Жаратушының ризашылығына бөлеп, ақыретте сый-сыяпатқа кенелтеді. Діннің мақсаты адамды екі дүние бақытына қол жеткізу.
— Енді сақалыңды алып тастамайсың ба?
— Маған қайын атам да сақалыңды қырып таста, банкке жұмысқа тұрғызайық деген. Бірақ, пайғамбарымыз сақалын қырмаған ғой. Сақалды бір тұтам өсіріп, бір тұтамнан артығын қырқу сүннет.
— Бос уақытыңды қалай өткізесің? Теледидар көрмейсің бе, сонда?
— Техникаға жақындығым бар еді, қолыма түскен заттарды жөндеп, түзетуге құштармын. Сондықтан телефон, планшет жөндейтін шеберхананы мына жігіт екеміз бірігіп ашып алдық. Бос уақытым осыларды шұқылаумен өтеді көбіне. Ал үйде болғанда Пайғамдарымыздың хадистері мен ислам ғұламаларының уағыздарын оқып, дін жолындағы білімімді арттыруға тырысамын.
Осы сақалы үшін Досан полицияның тіркеуге алғанын айтады. Үйіне келіп, қолын қайырып бөлімшеге бірақ алып кеткен. Жөндеп жатқан елдің ұялы телефон, планшеттерін де тәркілеген. Ешқандай күдік тудыратын заттар таппағасын қоя берді дейді. Бірақ, тәркіленген телефондардың ішінен тыйым салынған бейнематериалдардың бар-жоғы анықталғаннан кейін қайтарылатынын айтқан.
— Ұлы сөздің ұяттығы жоқ, ажырасып жатқаныңа жарты жыл бопты. Жас жігітсің, қыздарға бармайсың ба?
— А, е, жоқ! Алладан сабыр сұраймын. Ислам діні адамды сабырлы болуға үйретеді. Мені ерекше тәнті еткені де осы. Мұсылман адам қандай қиындыққа тап болса да, артын сабырмен күтеді. Сонда ғана Жаратушы Иеміз пендесіне тура жолды нұсқайды. Дінге бет бұруым маған үміт сыйлап, күш дарытады. Намаз жанымды жай таптырады, — деді Досан.
Бүгінде мұсылмандық жолына түсіп, намазға жығылып жатқандар аз емес. Бастысы, осындай жастарымыз нақ ислам дінінің, Құран кәрімнің шынай мағынасы мен алауыз ағымдардың аражігін ажырата алса болды.
Аяжан Төрехан