Қазақстан Ауғанстан халқының бейбіт өмір сүріп, тұрақты даму жолына түсуін қалайды.
Еліміз келесі жылы БҰҰ Қауіпсіздік кеңесіне төрағалығы кезінде дәл осы мәселені көтермек. Бұл туралы Ташкентте өткен ТМД елдерінің Сыртқы істер министрлер кеңесінің мәжілісінен кейін Орталық Азиядағы 5 мемлекеттің ведомства басшыларының өзара басқосуы кезінде Қайрат Әбдірахманов мәлімдеді, – деп хабарлады “Хабар-24” телеарнасы.
Қайрат Әбдірахманов, ҚР Сыртқы істер министрі:
– Уақытында Н.Ә. Назарбаев өзінің БҰҰ мүшелеріне саяси үндеуінде осы Орталық Азияны үлкен бір бейбітшілік қауіпсіздік және даму өңіріне айналдыру туралы бастама жасаған болатын. Қазір біз сол бастаманы іске асыру бойынша практикалық әр түрлі шараны талқыладық.
Атап айту керек, Орталық Азия елдерінің Сыртқы істер министрлері біздің бастамаларымызға үлкен қолдау көрсетіп жатыр. Біздің негізгі мақсатымыз осы Орталық Азиядағы соңғы кезде бәріміз байқап отырған позитивті тенденцияны күшейтіп оны алға апару болып табылады.