Алатау ауданындағы Халыққа қызмет көрсету орталығына 53 жастағы ер адам әйелімен тұрғылықты мекен-жайы бойынша тіркеуге тұру үшін келген екен.
„Азаматтарға арналған Үкімет„ мемлекеттік корпорациясының баспасөз қызметі Алматы қаласы Алатау ауданындағы Халыққа қызмет көрсету орталығында мерт болған адамға қатысты мәлімет берді.
„Алматы қаласы Алатау ауданының Халыққа қызмет көрсету орталығында бүгін -2017 жылдың 16-қаңтарында 1964 жылы туылған Құнтақов Жарас Нұркібайұлының қаза болғанын қайғыра отырып, жеткіземіз. Жарас Нұркібайұлы әйелі екеуі „Тұрғылықты мекен-жайы бойынша азаматтарды тіркеу қызметіне жүгіну үшін ЦОН-ға сағат 09:30-да келген. Бұл кезде мекемеде кісі көп болмағанын баса айта кетелік.
Әйелі қағазды толтырып жатқанда ол бірыңғай электронды кезектің талонын алып үлгермей, өзін жайсыз сезінген. Оған сол арада кезекшілік еткен медициналық көмектің медбикелері 09:42 уақытында көмек көрсеткен. Жедел жәрдем көлігі сағат 09:52-де келіп жетті, алайда ер адамды аман алып қалу мүмкін болмады. „Азаматтарға арналған Үкімет„ мемлекеттік корпорациясы Жарас Нұркібайұлының туған-туыстарына қайғырып, көңіл айтады„ деп хабарлады аталған мекемедегілер.
„Азаматтарға арналған Үкімет„ мемлекеттік корпорациясы созылмалы дерті бар азаматтарға Халықққа қызмет көрсету орталығына адам көп болатын уақытта қызметке жүгінбей-ақ қоюға кеңес береді.
Сондай-ақ Халыққа қызмет көрсету орталығында мүгедек және аяғы ауыр әйелдерге арналған жеке терезе барын еске салады. Ал І және ІІ-топтағы мүгедек жандар №1414 нөмірін теру арқылы ЦОН қызметкерлерін үйге шақырып, тіркеле алады.
Еске сала кетелік, бүгін – 16-қаңтарда таңертең Алматыда Алатау ауданында бір ер адамның көз жұмғаны хабарланған еді.