Оңтүстік Қазақстан облысының тәртіп сақшылары қарасора өсірумен айналысқан түркістандық екі тұрғынды құрықтады.
Бұл туралы Оңтүстік Қазақстан облысы ішкі істер департаментінің баспасөз қызметі хабарлады.
Биыл 6-қыркүйекте ОҚО ішкі істер департаментінің Есірткі бизнесіне қарсы күрес басқармасының қызметкерлері Түркістан қалалық ішкі істер басқармасының қызметкерлерімен бірлесе жүргізген «Көкнәр -2016» және «Өрмек» жедел алдын алу іс-шаралары барысында құрамында есірткі заттары бар өсімдіктерді өсірген 1940 және 1976 жылдары туылған Түркістан қаласының екі тұрғынын құрықтады.
Сот-криминалистикалық сараптамасының қорытындысына сәйкес, табылған заттардың жалпы салмағы 135 грамды құраған. Кептірілгені – 20 грамм, одан тыс 5 түп «қарасора» есірткі өсімдігі табылған.
Аталған жайт бойынша ҚР Қылмыстық кодексінің 300-бабымен «Құрамында есірткі заты бар тыйым салынған өсімдіктерді өсіру» бойынша қылмыстық іс қозғалды. Күдіктілерге ешқайда кетпеу туралы қолхат табыс етілді. Сотқа дейінгі тергеу амалдары жүргізілуде.