Жайықтың суы Оралдан 250 шақырым жердегі Қараөзенге қосылмақ. Бұл Ресейден келетін суға тәуелділікті азайтуға сеп. Сондай-ақ суармалы егіс көлемін ұлғайтуға мүмкіндік береді.
Бұл туралы khabar.kz хабарлайды.
Орал қаласының іргесінен басталатын 44 шақырымдық Көшім каналы Жайық суын Киров су қоймасына жеткізеді. Сол жерден тіршілік көзі 4 бағытқа таралады. Бірі – Шежін каналы. 1969 жылы салынғаннан бері тазаланбағандықтан, каналдың жағасын қамыс, түбін топырақ басып, әбден тайыздап кеткен еді. Қазір арнаны аршу жұмыстары жүріп жатыр. Киров-Шежін су арнасының жалпы ұзындығы – 161 шақырым. Ар жағында Қазталов ауданымен өтетін Қараөзенге қосу үшін жаңадан 20 шақырым канал қазылмақ. Ол келер жылдың еншісінде. Дәл қазір екінші кезеңде арнаның 75 шақырым бөлігін ашу жұмыстары жүргізілуде. Былтыр 55 шақырымы тазаланған еді.
-Жоба бойынша кеңейту керек. Қазір деңгейі 8-10 метрге дейін кеңейтіліп отыр. Бұған бөлінген қаражат 854 млн ақша болса, бүгінгі күнге 464 млн игерілді. Орал өңірі Ресейдің Волгоград облысынан жылына 26 млн, Саратовтан 63 млн текше метр су алады. Сол үшін 1,5 млрд теңге төлейді. Демек, бір текше метрі 16 теңгеге шығады. Басқа балама көзі болмағасын алғашқысынан алар судың мөлшерін қысқарту мүмкін емес. Ал Саратовтан Қараөзен мен Сарыөзенге жіберілер су көлемін төмендетуге, яғни көршілерге тәуелділікті азайтуға болады. Ел қазынасынан 3 млрд теңге бөліп, Жайықтың суын оңтүстік аудандарға жеткізудегі мақсат та осы.
Нұрболат Жұмағалиев, «Қазсушаруашылығы» РМК БҚО филиалының директоры:
-Бұл жоба Ресейден жылма-жыл су құны көтерілуіне байланысты. Биыл Ресей суына 1 млрд 548 млн жұмсадық. Келесі жылы осы жоба іске асқанда Ресейге 380-450 млн қаражат төлемақыны азайтамыз. Сонда осы жоба құрылысы 7-8 жылда қайтарымын табады деп есептейміз. Сонымен қатар жобаның жүзеге асуы ауыл шаруашылығына да оң әсер етпек. Арна бойындағы ауылдарда қазірдің өзінде серпіліс сезіледі.
Бекет Қуанышқалиев, Тасқала ауданының тұрғыны, шаруа қожалығының жетекшісі:
-Су бар жерде, тіршілік бар. Осы каналды тазартып, су көбейгеннен бері жас жігіттер шаруа қожалығын ашып, каналдың іргесіне үйін салып жатыр. Ол жастарға жақсы көмек болды. Жобаны іске асыру арқылы 6 мың гектардай көлтабанға су шығаруға, суармалы жер көлемін 130 мың гектарға арттыруға мүмкіндік бар.