Созақ ауданында сегіз жасар ұл бала әпкесін атып өлтірді

Жараланған қыз бала ауруханаға жетпей жолда көз жұмды.

Айта кетерлігі, балақайдың өліміне себеп болған қару еш жерде тіркелмеген, заңсыз сақталған мылтық боп шыққан.

“Оқыс оқиға Созақ ауданында болды. Каникулда жүрген балалар Сызған ауылына әжесінің үйіне барған. Қанды оқиғаға сеп болған қару заңсыз сақталғандығы анықталды”, – дейді Түркістан облыстық ІІД əкімшілік полиция басқармасының азаматтық жəне қызметтік қару айналымын бақылау инспекторы Асхат Шарафутдинов.

Осындай қайғылы жағдайларды болдырмас үшін Түркістан облыстық ІІД заңсыз қаруды ерікті түрде өткізуге мүмкіндік беретін түрлі акциялар мен арнайы операциялар ұйымдастыруда.

“Шілденің 30 мен тамыздың 2-сі аралығында Түркістан облыстық ІІД өткізген “Қару” жедел-профилактикалық іс шарасы кезінде 13 қаруды ерікті түрде тапсырса, 10 заңсыз қару тəркіленіп алынды. Сəуірдің 10-ы мен мамырдың 30-ы аралығында да арнайы ұйымдастырылған акция аясында 334 заңсыз сақталған қаруды мемлекет сатып алды.

Ол үшін бюджетен 17 млн. 500 мың теңге бөлінген болатын. Заңсыз сақталған атыс қаруларын ерікті түрде өткізген жағдайда əкімшілік, қылмыстық жауапкершілікке тартылмайтынын ескертеді”, – дейді Түркістан облыстық ІІД əкімшілік полиция басқармасының азаматтық жəне қызметтік қару айналымын бақылау инспекторы Асхат Шарафутдинов.