Солтүстік Қазақстанда 5 жасар бала құтқарылды
Солтүстік Қазақстан облысында қар құрсауында қалған Жамбыл ауданында 5 жасар баланың дене қызуы көтеріліп, ауруханаға жете алмай, төтенше қызметтен көмек сұралды.
Бұл туралы облыстық төтенше жағдайлар департаментінің баспасөз қызметі хабарлады.
„8 ақпан күні түстен кейін облыстық төтенше жағдайлар департаментінің Өрт сөндіру және авариялық-құтқару жұмыстары қызметінің №11 – өрт сөндіру бөліміне аудан орталық ауруханасынан дене қызуы жоғары баланы орталыққа жеткізу керектігі, бірақ қар құрсауында отырғандықтан шыға алмайтындарын айтып, көмек сұрап хабарласты.
Дереу арада аудан орталығы Пресновкадан 20 шақырым қашықтықта орналасқан Үлгі ауылына құрамында 3 адамы бар КамАЗ автомобилі жолданды. Шақырту орнына Благовещенка ауылынан шыққан жедел медициналық көмек бригадасы қарлы бұрқасынның салдарынан жабылып қалған жолдан жас сәбиге көмекке жете алмаған„ делінеді арнайы хабарламада.
Жоғары өтімді «Вахтовка» биік қар үйінділерінен еңсере өтіп, ауылға бір сағатқа жетер-жетпес уақытта келіп жетті. Олар бес жасар Досымжан мен оның ата-анасын Благовещенка ауылының ауруханасына жеткізді.
Бала шұғыл ауруханаға жатқызылды. Дәрігерлердің айтуынша, қазір баланың өміріне қауіп төніп тұрған жоқ.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе