Семейде ұйытқыған боран қала маңындағы ауылдармен байланысты үзіп, жолдарды жапты.
Бұл туралы Семей қалалық төтенше жағдайлар басқармасының баспасөз қызметі хабарлады.
9-ақпанда бір тәулік ішінде облыстық төтенше жағдайлар департаментінің өрт сөндіру және авариялық-құтқару жұмыстары қызметінің №2 жасағы бірнеше құтқару операцияларын жүргізді.
9-ақпанда қаладан 52 шақырым жерде орналасқан Талица ауылына ес-түссіз жатқан әйелге медициналық көмек көрсету және қалаға жеткізу үшін жедел жәрдем көлігімен семейлік құтқарушылар бірге шықты. Дегенмен, қардың қалындығына байланысты көліктер діттеген жерге жете алмағандықтан, 7-ӨСБ құтқарушылары шынжыр табанды көлікпен көмекке барып, дәрігерлер ауыр техникамен ауыл ішіне дейін жеткізілді, сырқат адамды жедел жәрдем көлігіне салып, қалалық емханаға дейін құтқарушылар ілесе шығарып салды.
Сондай-ақ, Өрт сөндіру және авариялық-құтқару жұмыстар қызметінің жеке құрамының 5 қызметкері Семей қаласынан 20 шақырым жерде Семей-Алматы авто жолдарында қар құрауында қалған «Талдықорған – Семей» халықаралық автобусынан 25 адам және жеңіл көліктерден 35 адам, барлығы 60 адамды көшірген, оның 7-і – бала.
Семей қаласынан 60 шақырым қашықтықта Семей-Қарауыл трассасында қалған қалаға Камаздың 2 жүргізушісі жеткізілді. Семей қаласынан 40 шақырымдағы Семей-Өскемен трассасынан 7 адам көшірілді, бірақ трассада батқан көліктер көп болғанымен көбі мүліктерін тастағысы келмегендіктен, көмектен бас тартты. Семейлік құтқарушылармен бір тәулік ішінде жалпы есеппен 127 адам және 9 бала құтқарылып, қар құрсауынан эвакуацияланды. Қаза тапқандар және зардар шеккендер жоқ.
Құтқарушылар ауа райының қолайсыз болуына байланысты уақытша алыс жолға шықпауға және жолға шығар алдын көліктің техникалық жағдайын тексеруге, сонымен қатар, дауылдық ескертулер туралы ақпараттарға құлақ салуға кеңес береді.