Астанада Мемлекеттік хатшы Гүлшара Әбдіқалықованың төрағалығымен Қазақстан Республикасының Президенті жанындағы Сыбайлас жемқорлыққа қарсы іс-қимыл мәселелері жөніндегі комиссия отырысы өтті.
Отырыста Польшадағы Қазақстан Республикасының Төтенше және өкілетті елшісі Алтай Әбибуллаевты мемлекеттік қызмет туралы заңнаманы бұзғаны үшін тәртіптік жауапкершілікке тарту туралы мәселе қаралды. Комиссия отырысының қорытындысы бойынша Алтай Әбибуллаевқа қызметке сәйкестігінің толық еместігі туралы ескерту түріндегі тәртіптік жаза қолдану жөнінде Мемлекет басшысына ұсыныс енгізуге шешім қабылданды.
Елшінің не бүлдіріп қойғаны туралы мәлімет ашып айтылмады.
Алтай Әбибуллаев 2016 жылдың 11-мамырында Польшадағы Қазақстан Республикасының елшісі болып тағайындалған. Алдында ол ҚР сыртқы істер министрлігінің айырықша тапсырма жөніндегі елшісі және ресми өкілі лауазымында болып еді.