Петропавлда Береке шағын ауданында жылу құбырын тартып жатқан кезде адам сүйектері табылды. Экскаватор сүйектердің бір бөлігін сындырып тастаса, кейбірі топырақпен араласып кеткен.
Бұл туралы қалалық ішкі істер департаментінің баспасөз қызметінің қызметкері Динара Сағандықова мәлім етті деп хабарлады BNews.kz.
Жұмысшылардың айтуынша, адам қаңқасы бір метр тереңдікте жатқан. Өткен аптада да құрылысшылар адамның бас сүйегін тауып алған екен. Құрылыс бригадасы оиға орнына полицейлерді шақырды.
«Оқиға орнына Петропавл ішкі істер басқармасының жедел тергеу тобы аттанды. Табылған адам сүйектері сараптамаға жолданды», – деп түсіндірді Динара Сағандықова.
Қазір қаңқаның пайда болуына қатысты түрлі болжам айтылып жатыр. Құрылыс жүріп жатқан жерде ескі зират орналасқан болуы мүмкін деген болжам да қарастырылуда. Алайда Сәбит Мұқанов атындағы облыстық кітапхана жанындағы «Өлкетанушы» клубының мүшесі Лидия Мелехина бұл болжаммен келіспей отыр.
– Бұл мекенде зират болған жоқ. Қала Подгорья ауданы жақтан бой көтере бастағанда, бейіт тауда орналасқан. Себебі ауданды жиі су басатын. Зират саябаққа дейін жетіп, «Қарасай» стадионы маңында болды, – дейді Мелехина.