Бүгін Оралда тәртіптік кеңес отырысында 200 мың теңге парамен ұсталған жергілікті басқарманың қызметкерінің мәселесі қаралды. Жазықсызбын деген ол өз әрекетін басшысының рұқсатымен жасағанын айтады. Тіпті оны жасырын камераға түсіріп алыпты.
Бұл туралы КТК арнасы хабарлайды.
Видеода Ішкі мемлекеттік аудит басқарма басшысының орынбасары Меңдібек Ақмалиевке қарамағындағы қызметкері қаржылық аудиттегі былықтарға көз жұма қарау үшін, «200 мың теңге пара береміз» деген ұсыныс түскенін айтып тұр. Ал, шенеунік болса мән-жайды толық білген соң, «ойланып көрейік» дейді. Жасырын камераға түсіріп тұрған қызметкер осы видео арқылы тәртіптік кеңес отырысында жазықсызбын деп ақталды.
“Ақмалиевтің әрекетінен заң бұзушылық анықталды. Жемқорлық мәселесіне қатысты әңгіме қозғалса, басшы қарамағындағы қызметкерді жазалау керек. Енді ішкі мемлекеттік аудит басқармасы жіті бақыланатын болады. Барлық қызметкерлерге түсіндіру жұмыстары жүргізіледі.
Ал, пара алып жатқанда құрықталған қызметкер 12 миллион теңге айыппұл төлейді”,-
деді БҚО мемлекеттік қызмет істері және сыбайлас жемқорлыққа қарсы күрес басқармасының басшысы.