Оңтүстік Қазақстанның тәртіп сақшылары Тілдер күнін тойлады

Оңтүстік Қазақстан облысы ішкі істер департаментінде Қазақстан халықтарының Тілдері күні мерекесі аталып өтті.

Бұл туралы облыстық ішкі істер департаментінің баспасөз қызметі хабарлады.

Іс-шараға облыстық ішкі істер департаментінің құрылымдық бөлімдерінен жалпы 15 команда өнер көрсетті. Командалар Қазақстанда тұратын түрлі этностардың салт-дәстүрлерін, мәдениеттерін, тарихын, ұлттық құндылықтарын дәріптеді. Сондай-ақ түрлі этностардың жөн-жоралғылары мен салт-дәстүрлерін бейнелейтін театрландырылған көріністер көрсетті. Ән-биден шашу шашып, ұлттық тағамдар мен киімдердің топтамасын ұсынды.

Сайыс қорытындысына сәйкес, өзбек ұлтының салт-дәстүрі мен мәдениетін дәріптеген Шымкент қалалық ішкі істер басқармасының әл-Фараби полиция бөлімшесінің қызметкерлері басқалардан оқ бойы оза шауып бірінші орынды иеленді. Ал,ІІ-орынды қырғыз және тәжік этностарының құндылықтарын көрсете білген Сарыағаш және Түлкібас аудандық ішкі істер басқармасы, ІІІ-орынды қазақ және күрт ұлттарының жөн-жоралғыларын ауқымды көрсете білген Созақ және Бәйдібек аудандарының тәртіп сақшылары иеленді.

Айтып өтейік, түрлі этнос пен ұлыстардың тілдері мен мәдениетін дәріптейтін, Қазақстан халықтарының бірлігі мен ынтымақтастығын нығайтатын бұл іс-шара оңтүстік өңірде дәстүр бойынша жыл сайын өткізіледі.