Мұғалімді айуандықпен өлтірген еркек 12 жылға сотталды

Оралда бастауыш сынып мұғалімін айуандықпен өлтірді деген күдікті, 41 жастағы азаматқа қатысты сот процесі аяқталды. Қылмыстық істер жөніндегі ауданаралық соты оны 12 жылға бас бостандығынан айырды.

Мұғалімнің қызы Кристина Мишина сот шешімімен келіспейді. Ол жазаның тым жеңіл екенін айтты.

«Қатыгездікпен жасалған өлімге 12 жылды тым аз деп санаймын», – дейді мұғалімнің қызы.

Естеріңізге сала кетейік, бастауыш сынып мұғалімін 25 сәуірде өз пәтерінен өлі күйінде тапқан болатын. Іс материалдарына сәйкес, 24 сәуірде Никитина компьютерін жөндеуге көмек сұрап, Сәрсеновке жүгінген. Ол келіп, жұмысты аяқтамай, келесі күні келетінін айтқан.

25 сәуірде Сәрсенов ноутбугымен келіп, ұйықтайтын бөлмеде компьютерді жөндей бастаған, ал Никитина ас үйде оқушымен сабақ өткізіп жатқан. Сабақтан кейін екеуі сөзге келіп, Сәрсенов Никитинаны диванға құлатып, оның кофтасының жағасымен буындырып, кейін мойнына пышақ жарақатын салған. Өлім себебі – тұншығу.

«Дұшпан алыстан келмеген» деген күдікті сейілту үшін – пәтерге ұры түскендей етіп, бағалы заттың бәрін үптеп кетіпті. Ол Никитинаның алтын бұйымдарын, әмиянын, телефонын, банк карталарын алып кеткен. Жалпы материалдық шығын 2 миллионға жуық теңге.