“Махаббат не істетпейді?”. Өскеменде ер адам өзіне пышақ салған әйелді кешірді

Өскеменде азаматтық некеде тұрып жатқан күйеуімен жанжалдасып, пышақтап, өлтіріп ала жаздаған әйелге қатысты сот үкімі шықты.

Қайғылы оқиға таңға қарай орын алған деп хабарлады YK-news.kz.

32 жастағы әйел үйіне таңға қарай оралған. Бір күн бұрын ол бірге тұрып жатқан еркекпен өзара сөзге келіп, туған күнін тойлауға апасына кетіп қалады. Бірақ сол кеткеннен ер адам оған хабарласпаған. Қатты ашуланған әйел түні бойы ұйықтай алмай дөңбекшіп, таңға қарай тура үйіне қарай тартады. Келе салып, „Неге туған күніммен құттықтамадың„ деген ол тәтті ұйқыда жатқан күйеуінің жағасынан ала кетеді. Әйелінің бұл қылығына қатты жыны келген ұйқылы-ояу еркек оны бірнеше рет шапалақпен тартып жібереді. Сол кезде әйел ас үйге жүгіріп барып, қолына пышақ алып, оны күйеуіне сілтейді.