Әлеуметтік желіні қолданушылар жол полициясының ала таяқсыз қалай қызмет ететінін көз алдыға елестетер видео салып, әзілдеп жатыр.
Көкшетаулық Инстаграм желісін қолданушы ала таяқсыз жол полициясының қолын бұлғап, көлікті тоқтатқаны такси ұстап тұрған адамға ұқсайтынын жазады. Ал таксилер қол бұлғаған адамның барлығына тоқтай бермейді, сондықтан жол полициясын да елемей кете беруге болатын секілді дейді.
«Kartop.TV» жобасын жүзеге асырушылар құлқының көлденең ақша тескен жол полициясы таяқсыз да көлікті тоқтатудың әлдебір жолын тауып алады дегенге саятын видео жариялады.
Еске сала кетелік, 1-қаңтардан бастап еліміздегі жол-патрульдік полиция қызметкерлері толығымен автопатрульге ауысты. Бұдан былай көшеде ережені бұзған көлік жүргізушілерін алатаяқпен тоқтатуға рұқсат жоқ.