Конституциялық реформаға байланысты Қазақстан азаматтары 6 мыңнан астам ұсыныс жасады.
Бұл туралы бүгін Ақордада Елбасы Нұрсұлтан Назарбаевтың төрағалығымен өтіп жатқан билік тармақтары арасындағы өкілеттіктерді қайта бөлу жөніндегі жұмыс тобының кезекті отырысында ҚР Президенті Әкімшілігінің басшысы, жұмыс тобының жетекшісі Әділбек Жақсыбеков мәлім етті, деп хабарлайды ҚазАқпарат.
Оның атап өтуінше, ұсыныстар еліміздің барлық өңірлерінен және халықтың барлық топтарынан келіп түскен. «Соңғы күндері ұсыныстар өте көп болды. Азаматтардан 6 мыңнан астам түрлі ұсыныстар келіп түсті. Олар Конституцияның 98 бабының 63-іне қатысты және Ата заңның барлық бөлімдерін қамтиды», – деді Жақсыбеков