Көкшетауда 10 айлық сәби менингитке шалдықты деген күдікпен ауруханаға жатқызылды. Балаға «менингикок инфекциясы» диагнозы қойылғанымен, зертханалық растау жоқ.
Бұл туралы Stan.kz хабарлады.
«30 мамыр күні түнде Біржан сал ауданынан он айлық қыз аурухана түсті. Сәби жансақтау бөлімінде жатыр, жағдайы өте мүшкіл. Клиникалық деректер негізінде «менингикок инфекциясы» диагнозы қойылды. Бірақ әлі зертханалық растау жоқ, сынақтарды күтіп отырмыз»,- деді Ақмола облыстық ауруханасының бас дәрігерінің орынбасары Татьяна Бишораева.
«Ауруды анықтау, оны емдеу жолы туралы дәрігерлердің кеңесі шақыртылды. Қазір республикалық дәрігерлермен консультация жүргізілуде», – деді Татьяна Бишораева.
Айта кетейік, Қазақстанда сегіз адам менингиттің құрбаны болды. Бұл дерттен көз жүмғандардың төртеуі Алматының, екеуі Алматы облысының, тағы екеуі Оңтүстік Қазақстан облысының тұрғындары. Сондай-ақ, Астана қаласында менингит диагнозы расталған үш жасар бала ауруханаға жатқызылды, ал Алматыда тағы 30 адам ем алуда.