Қостанайда жарықтан ажыратылған пәтердің иесі үй ішінде қоқыс жаққан
Қостанай облысында көпқабатты үйде пәтер өртеніп, 64 адам қауіпсіз жерге шығарылды. Үй иесі мерт болды.
Бұл туралы облыстық төтенше жағдайлар департаментінің баспасөз қызметі хабарлады.
Өрт Қобыланды батыр көшесіндегі тұрғын үйдегі пәтердің бірінен шыққан. Оқыс оқиға 5 қараша күні болды. Түн жарымда 64 адам қауіпсіз жерге шығарылды. Өрт шыққан пәтерден 1960 жылы туған әйелдің мәйіті табылды.
«Үй иесі – жалғызбасты әйел ішімдікке әуес болған. Жұмыс істемеген. Көптен бері коммунальдық қызметтің ақысы төленбепті. Сондықтан пәтер жарықтан ажыратылған. Мұның бәрін көршілері растап отыр. Жылыну үшін әйел ел ұйқыға кеткенде түнде үйдің ішіне қоқыс жағып келген. Тұрғын үй өртінің шығу себебі осы болуы мүмкін. Бұған дейін де біздің қызметкерлер әйелдің пәтеріне бірнеше рет барып, өрт қауіпсіздігі туралы түсіндірме жұмыстарын жүргізген», – деді облыстық ТЖД бастығының орынбасары Азамат Орынбаев.
ТЖД қызметкерлері қазірге дейін қаладағы 2657 ауланы аралап, тұрғындарды өрт қауіпсіздігін сақтауға шақыруда. Жылыту маусымы басталғалы бері өңір бойынша 37 тұрғын үй өрті болып, 3 адам көз жұмды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе