14 қараша күні өтетін жалпыхалықтық диктантқа ең кемі 80 мың алматылық қатысады, дейді 24.kz.
Аталған іс-шара мектеп, колледж, университеттерде және этно-бірлестік кеңселерінде өтеді. Негізгі мақсат — жаңа әліпбиге байланысты азаматтардың ой-пікірін білу. Жаңа әліпбидің емле ережелерінің жобасын Ахмет Байтұрсынұлы атындағы Тіл білімі институтының ғалымдары жасаған. Жұмыс барысында кирилл таңбасындағы қазақ әліпбиінің емле қағидалары басшылыққа алынған. Бірақ
жаңа әліпбиде э, ю, я дыбыстары мен жіңішкелік және жуандық белгілерінің болмауына байланысты емле ережелеріне де жаңалықтар енгізіліп отыр.
Анар Салқынбай есімді филология ғылымының докторы, профессор былай дейді:
— Мысалы «ансамбль» деген сөзді «әнсәмбіл» деп айтып жіңішкелік белгісін жазудың орнына оны жіңішкертіп айту мәселесі бүгінгі емледе нақты қолға алынып отыр.
Қоғам қайраткері Дос Көшім:
— Тілдік реформа жасалған уақытта емле анықталмаса, емле белгіленбесе, дыбыстың қабыршақтарын қоя салғаннан ештеңе болмайды. Себебі дыбыстар бірімен-бірі біріккенде, араласқан уақыттарда өзгерістер болады.