Энергетика вице-министрі Әсет Мағауовтың сөзінше, 2018 жылдан бастап Аи-80 бензинінің өндірісі мүлдем тоқтатылады.
Оның айтуынша, 80-ші бензин елге онша қажет емес екен. Қазақстанда жүрген жеңіл көліктердің 99 пайызы 92-ші бензинге арналған дейді.
«Техникалық паспорттар мен экологиялық талаптарға сай, жұрттың бәрі 92-ші бензин құюы керек. 80-ші бензиннің тұтыну нарығы тым шектеулі. Ескі көліктерге ғана қажет. Оған қазір ол 90-шы жылдарағыдай сұраныс жоқ», — деді Мағауов Астанадағы брифинг барысында.
Вице-министр Аи-80 бензиніне деген сұранысты халықтың кедейлігімен түсіндіреді.
«Халық неге 80-ші безин құяды? Біздің ойымызша, халық ақшасын үнемдегісі келеді. Көлігі 92-ші бензинге арналған болса да, олар 80 құяды, — деп қосты.
«Бірақ әскерилерге, коммуналдық қызметткердің арнайы тапсырысы бойынша қажетті көлемдегі 80-ші бензин өндірілуі мүмкін. Ал 2018 жылдан бастап Аи-80 бензинін жаппай өндіру тоқтатылады», — деді Мағауов.