Зарафшан қалалық соты Өзбек ССР Жоғарғы Кеңесінің бұрынғы депутаты Самандар Қоқановтың түрме мерзімін тағы 3 жыл 5 күнге созды.
Өзбекстанның Жазаларды орындау бас басқармасы Самандар Қоқановтың отбасына хабарласып, түрме мерзімінің созылуына жазасын өтеушінің түрме ережелерін “үнемі” бұзуы себеп болғанын, сот шешімі 7 қазанда шыққанын айтқан.
Түрмеде 23 жыл және 4 ай отырған Қоқановты адам құқығын қорғаушылар саяси тұтқын деп есептейді. Бұл тәуелсіз Өзбекстан тарихындағы ең ұзақ түрмеде отырған саяси тұтқын. Ол 1993 жылы 2 маусымда мемлекет мүлігін талан-таражға салды деген айыппен ұсталды. Қоқановты жақтаушылар 80-жылдары танымал саясаткер болған депутат әрі кәсіпкерді Өзбекстанның бірінші президенті Ислам Кәрімовтың жеке тапсырмасымен ұстады деп есептейді.
Самандар Қоқанов 1989 жылы қазіргі премьер-министр, президент қызметін уақытша атқарушы Шавкат Мирзиёевпен бір уақытта депутат болып сайланған.